သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ ပြည်ထောင်စုဝန်ကြီး ဦးခင်မောင်ရီသည် နေပြည်တော်ရှိ မြေငလျင်ဒဏ်သင့် ဝန်ထမ်းအိမ်ရာများသို့ သွားရောက်၍ ကယ်ဆယ်ရေးလုပ်ငန်း ဆောင်ရွက်နေမှုများ၊ ဝန်ထမ်းများ နေရာပြောင်းရွှေ့ ချထားမှုများအား ကြည့်ရှုပြီး ဝန်ထမ်းမိသားစုများအတွက် နေထိုင်စားသောက်ရေးနှင့် ကျန်းမာရေးစောင့်ရှောက်မှု ကိစ္စရပ်များအား ဖြည့်ဆည်းဆောင်ရွက်ပေးသည်။
၂၈-၃-၂၀၂၅ ရက်နေ့ ညနေပိုင်းတွင် ပြည်ထောင်စုဝန်ကြီးသည် ဒုတိယဝန်ကြီး၊ အမြဲတမ်းအတွင်းဝန်၊ ဌာနဆိုင်ရာအကြီးအကဲများနှင့်အတူ နေပြည်တော်၊ ခရေအိမ်ရာ တိုက်အမှတ် ၆၃၊၆၄၊၆၅၊၆၆၊၆၇၊၆၈ ရှိ ဝန်ထမ်းအိမ်ရာများ ပြိုကျပျက်စီးမှုကြောင့် အပျက်အစီးများ အောက်တွင် ပိတ်မိနေသော ဝန်ထမ်းမိသားစုများအား ကယ်ဆယ်ရေးဆောင်ရွက်နေမှု အခြေအနေအား ကြည့်ရှုပေါင်းစပ်ကူညီပြီး ဝန်ထမ်းမိသားစုများနှင့်တွေ့ဆုံကာ အားပေး စကားပြောကြားသည်။ ထို့နောက် ဝန်ထမ်းမိသားစုများအား နေရာပြောင်းရွှေ့ချထားရေး၊ လိုအပ်သော ကျန်းမားရေး စောင့်ရှောက်မှု ဆောင်ရွက်ပေးရေးနှင့် အုပ်ချုပ်ထောက်ပံ့မှုကိစ္စရပ်များ စီစဉ်ဆောင်ရွက်ပေးသည်။ ဆက်လက်၍ ပြည်ထောင်စုဝန်ကြီးနှင့်အဖွဲ့သည် ပြောင်းရွှေ့ဝန်ထမ်းများထားရှိမည့် ဒက္ခိဏသီရိမြို့နယ်ရှိ ပတ်ဝန်းကျင်ထိန်းသိမ်းရေးဦးစီးဌာန သင်တန်းကျောင်းနှင့် ကျောက်မျက် သင်တန်းဆောင်သို့ သွားရောက်၍ လိုအပ်သည်များ စီစဉ်ဆောင်ရွက်ပေးသည်။ ထိုမှတဆင့် ဧက ၁၀၀၀၊ ပိတောက်နှင့် ခရေအိမ်ရာများရှိ ဝန်ထမ်းအိမ်ရာများ ထိခိုက်ပျက်စီးမှုအခြေအနေများအား သွားရောက်ကြည့်ရှုစစ်ဆေးပြီး ဝန်ထမ်းမိသားစုများနှင့် တွေ့ဆုံကာ အားပေးစကား ပြောကြားပြီး လိုအပ်သည်များ ဆောင်ရွက်ပေးသည်။
၂၉-၃-၂၀၂၅ ရက်နေ့ နေ့လယ်ပိုင်းတွင် ပြည်ထောင်စုဝန်ကြီးနှင့် အဖွဲ့သည် ဇမ္ဗူသီရိမြို့နယ်ရှိ ကျောက်မျက်ပြတိုက်၊ မြန်မာ့ကျောက်မျက်ရတနာ ရောင်းဝယ်ရေးလုပ်ငန်းရုံး၊ မြန်မာ့ပုလဲ ထုတ်လုပ် ရောင်းဝယ်ရေးလုပ်ငန်းရုံးနှင့် မဏိရတနာကျောက်စိမ်းခန်းမများ၏ ထိခိုက်ပျက်စီးမှု အခြေအနေများ ကြည့်ရှုစစ်ဆေးသည်။ ထို့နောက် ဒက္ခိဏသီရိမြို့နယ်ရှိ ကျောက်မျက်ဂိုထောင်များအား ကြည့်ရှုစစ်ဆေးပြီး ပြောင်းရွှေ့နေရာချထားသော ဝန်ထမ်းမိသားစုများအား တွေ့ဆုံ၍ အားပေးစကား ပြောကြားပြီး လိုအပ်သည်များ စီစဉ်ဆောင်ရွက် ပေးသည်။ ထိုမှတဆင့် ဘူးကွဲဝန်ထမ်းအိမ်ရာ၊ ဧက ၁၀၀၀ ဝန်ထမ်းအိမ်ရာနှင့် ခရေဝန်ထမ်းအိမ်ရာများသို့ သွားရောက်၍ ဝန်ထမ်းများနှင့်တွေ့ဆုံကာ အားပေးစကားပြောကြားပြီး ဝန်ထမ်းမိသားစုများအား ပြောင်းရွှေ့နေရာချထားပေးရေးအတွက် စီစဉ်ဆောင်ရွက်ပေးသည်။ ယင်းနောက် ပျဉ်းမနားမြို့နယ်ရှိ မြန်မာ့သစ်လုပ်ငန်း၊ သင်တန်း ကျောင်းသို့ သွားရောက်၍ ပြောင်းရွှေ့ရောက်ရှိနေသော ဝန်ထမ်းမိသားစုများအား တွေ့ဆုံ အားပေးကာ အုပ်ချုပ်ထောက်ပံ့မှုကိစ္စရပ်များ စီစဉ် ဆောင်ရွက်ပေးသည်။
၃၀-၃-၂၀၂၅ ရက်နေ့ မနက်ပိုင်းတွင် ပြည်ထောင်စုဝန်ကြီးသည် ခရေအိမ်ရာမှ ပြောင်းရွေ့ နေသည့် ဝန်ထမ်းမိသားစုများနှင့် တွေ့ဆုံပြီး ညနေပိုင်းတွင် ဇေယျာသီရိမြို့နယ်၊ သစ်တော သုတေသနဌာနရှိ ဧည့်ရိပ်သာ၊ ဓမ္မာရုံနှင့် နေ့ကလေးထိန်းကျောင်းများသို့ သွားရောက်၍ ပြောင်းရွှေ့ ရောက်ရှိလာသော ဝန်ထမ်းမိသားစုများအား တွေ့ဆုံအားပေးကာ အုပ်ချုပ်ထောက်ပံ့မှု ကိစ္စများအား စီစဉ်ဆောင်ရွက်ပေးသည်။
၃၁-၃-၂၀၂၅ ရက်နေ့ နံနက်ပိုင်းတွင် ပြည်ထောင်စုဝန်ကြီးသည် ရုံးအမှတ်(၂၈)၊ အစည်းအဝေးခန်းမ၌ ဒုတိယဝန်ကြီး၊ အမြဲတမ်းအတွင်းဝန်၊ ဌာနဆိုင်ရာအကြီးအကဲများနှင့် အတူ မြေငလျင်ဒဏ်သင့် ဝန်ထမ်းများအား ကူညီထောက်ပံ့ရေးနှင့် နေရာချထားပေးရေး လုပ်ငန်းများဆောင်ရွက်နေမှုနှင့် ပတ်သက်၍ ညှိနှိုင်းအစည်းအဝေး ကျင်းပရာ ပြည်ထောင်စုဝန်ကြီးက လိုအပ်သည်များ ပေါင်းစပ် ညှိနှိုင်းဆောင်ရွက်ပေးပြီး ဝန်ထမ်းများအား တွေ့ဆုံ၍ အားပေးစကား ပြောကြားသည်။ ထို့နောက် ပြည်ထောင်စုဝန်ကြီးနှင့်အဖွဲ့သည် မြေတိုင်းဦးစီးဌာနရုံးအဆောက်အဦ ပျက်စီးမှုအခြေအနေအား သွားရောက်ကြည့်ရှုစစ်ဆေးပြီး လိုအပ်သည်များ ပေါင်းစပ်ညှိနှိုင်းဆောင်ရွက် ပေးခဲ့သည်။
