သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ ပြည်ထောင်စုဝန်ကြီး ဦးခင်မောင်ရီသည် နေပြည်တော်ရှိ မြေငလျင်ဒဏ်သင့် ရုံးအဆောက်အဦနှင့်ဝန်ထမ်းအိမ်ရာများသို့ သွားရောက်ကြည့်ရှုစစ်ဆေး

သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၊ ပြည်ထောင်စုဝန်ကြီး ဦးခင်မောင်ရီသည် နေပြည်တော်ရှိ မြေငလျင်ဒဏ်သင့် ရုံးအဆောက်အဦနှင့်ဝန်ထမ်းအိမ်ရာများသို့ သွားရောက်ကြည့်ရှုစစ်ဆေးပြီး ဝန်ထမ်းမိသားစုများနှင့်တွေ့ဆုံ အားပေးကာ ဝန်ထမ်းမိသားစုများ နေရာပြောင်းရွှေ့ချထားမှု၊ နေထိုင်စားသောက်ရေးနှင့် ကျန်းမာရေးစောင့်ရှောက်မှု ကိစ္စရပ်များအား ဖြည့်ဆည်းဆောင်ရွက်ပေးသည်။

၃၁-၃-၂၀၂၅ ရက်နေ့ နေ့လယ်ပိုင်းတွင် ပြည်ထောင်စုဝန်ကြီးသည် ခရေအိမ်ရာ၊ ပိတောက်အိမ်ရာနှင့် ကံ့ကော်အိမ်ရာများသို့ သွားရောက်၍ အဆောက်အဦ ထိခိုက်ပျက်ဆီးမှု အခြေအနေနှင့် ဝန်ထမ်းမိသားစုများ နေရာပြောင်းရွှေ့ဆောင်ရွက်နေမှု အခြေအနေအား ကြည့်ရှုစစ်ဆေးပြီး ဝန်ထမ်းမိသားစုများနှင့်တွေ့ဆုံကာ အားပေးစကားပြောကြားသည်။

၁-၄-၂၀၂၅ ရက်နေ့ နံနက်ပိုင်းတွင် ပြည်ထောင်စုဝန်ကြီးသည် ဇမ္ဗူသီရိမြို့နယ်၊ ရွှေကြာပင်ရပ်ကွက်ရှိ ကျောက်မျက်အသင်း အဆောက်အဦများသို့ သွားရောက်၍ ဝန်ထမ်းမိသားစုများအား ပြောင်းရွှေ့ နေရာချထားနေမှု အခြေအနေအား ကြည့်ရှုစစ်ဆေးပြီး ဝန်ထမ်းမိသားစုများနှင့်တွေ့ဆုံကာ လိုအပ်သည်များ ဖြည့်ဆည်းဆောင်ရွက်ပေးသည်။ ထို့နောက် ပြည်ထောင်စုဝန်ကြီးသည် ပိတောက်အိမ်ရာနှင့် ဧက ၁၀၀၀ အိမ်ရာများသို့ သွားရောက်၍ ဝန်ထမ်းမိသားစုများ နေရာ ပြောင်းရွှေ့ဆောင်ရွက်နေမှုအား ကြည့်ရှုစစ်ဆေးခဲ့ကြသည်။